Rev 13 | JAE | STEP | Go galic bôc teŋ kêpi aŋga gwêc gêmêŋ. Bôc tau nê jabo 10 ma môkêapac 7. Ma sunsuŋ 10 gêsac nê jabo ŋaô ma teto ŋaê alôb-alôb gêsac môkêapac.

Revelation of John 13

Bôc luagêc nêŋ biŋ

1 Go galic bôc teŋ kêpi aŋga gwêc gêmêŋ. Bôc tau nê jabo 10 ma môkêapac 7. Ma sunsuŋ 10 gêsac nê jabo ŋaô ma teto ŋaê alôb-alôb gêsac môkêapac. 2 Ma bôc tau, taŋ galic naŋ, ŋalaŋô amboac pusip saleŋŋa kapôêŋ ma akaiŋ amboac iwanê ma awasuŋ amboac lewe awasuŋ. Ma lêŋuckêm kêkêŋ nê ŋajaŋa to nê lêpôŋ ma nê ŋaclai kapôêŋ gêdêŋ eŋ. 3 Ma sêlic bôc tau nê môkêapac tau ŋateŋ kêtôm sêjac êndu, mago ŋakamoc sec tau gêmô. Tec lau nomŋa samob sê taêŋ ma têdaguc bôc tau. 4 Ma êsêac teteŋ mec gêdêŋ lêŋuckêm gebe kêkêŋ ŋaclai gêdêŋ bôc, go teteŋ mec gêdêŋ bôc tau ma sêsôm gebe “Asa kêtôm bôc tonaŋ ma asa kêtôm gebe ênac siŋ êndêŋ eŋ.”

5 Ma Anôtô gêlôc gebe bôc etoc tau sa ŋa awasuŋ kapôêŋ to êsôm biŋ alôb-alôb, ma kêkêŋ ŋaclai gêdêŋ eŋ gebe êŋgôm gêŋ tau êtôm ajôŋ 42. 6 Bôc tau gêŋa awasuŋ ma kêsôm biŋ alôb-alôb kêpi Anôtô to kêpi ênê ŋaê to ênê andu ma kêpi êsêac, taŋ sêŋgôŋ undambê. 7 Ma Anôtô gêlôc gebe eŋ ênac siŋ êndêŋ Anôtônê lau e êku êsêac tulu. Ma kêkêŋ ŋaclai gêdêŋ eŋ gebe êtu lau tomôkê-tomôkê to lau to-m-to-m ma lau aweŋ teŋ-aweŋ teŋ to lau totoŋ-totoŋ samob nêŋ ŋatau. 8 Ma lau nomŋa samob oc teteŋ mec êndêŋ bôc tau. Mago gêdêŋ taŋ Anôtô kêkêŋ undambê to nom atomgeŋ naŋ, lau tonaŋ nêŋ ŋaê kêsêp Domba, taŋ sêjac êndu naŋ, nê buku mata jaliŋa atom.

9 Ŋac teŋ nê taŋasuŋ embe ênêc, naŋ, êŋômaŋ.
10 Embe ênac ŋac teŋ ŋawae gebe êŋgôŋ kapoacwalô,
oc êsêp kapoacwalô êna.
Ma embe ênac ŋac teŋ ŋawae gebe sênac eŋ ŋa siŋ êndu,
oc sênac eŋ êndu.
Amboac tonaŋ Anôtônê lau sêôc gêŋwapac totêntac êpa sugeŋ ma sêkêŋ êwiŋ.

11 Go galic bôc tauŋa teŋ kêpi aŋga nom ŋalêlôm gêmêŋ. Bôc tonaŋ nê jabo luagêc kêtôm dombanê, mago kêsau biŋ kêtôm lêŋuckêm. 12 Ma gêjam kôm ŋa bôc ŋamataŋa nê ŋaclai gêmoa bôc tau laŋônêmŋa. Ma kêkac nom to êsêac, taŋ sêŋgôŋ nom naŋ, gebe teteŋ mec êndêŋ bôc ŋamataŋa toŋakamoc sec, taŋ gêmô su naŋ. 13 Ma eŋ gêgôm gêŋtalô kapôêŋ-kapôêŋ. Eŋ kêkêŋ ja kêsêp aŋga undambê gêmêŋ nom mêŋ-ŋamalac samob sêlic. 14 Bôc tau kêsau gêôc lau nomŋa samob ŋa gêŋtalô, taŋ Anôtô gêlôc gebe êŋgôm êmoa bôc ŋamata ŋalaŋônêm naŋ. Ma bôc tau kêsôm gêdêŋ lau nomŋa gebe sêmansaŋ bôc, taŋ kêtap siŋ ŋakamoc sa, mago gêmoa mata jali naŋ, nê ŋakatu teŋ. 15 Ma Anôtô gêlôc, tec bôc tau gêju awajaô mata jali kêsêp bôc ŋakatu gebe bôc ŋakatu êsôm biŋ ma enseŋ êsêac, taŋ teteŋ mec êndêŋ ŋakatu atom naŋ su. 16 Ma bôc tau kêkac ŋamalac samob, lau sauŋ to kapôêŋ ma lau tolêlôm to lau ŋalêlôm sawa ma lau, taŋ sêmoa nêŋ lêtêgeŋ naŋ, to gêŋôma gebe sepeŋ ŋatalô teŋ ênêc lemeŋ anôŋa me teŋbeleŋ. 17 Ŋac teŋ embe êtap ŋatalô tonaŋ sa atom, oc êtôm gebe ênam ôli gêŋ me êkêŋ gêŋ êndêŋ lau sênam ôli atom. Ŋatalô tonaŋ bôc tau nê ŋaê me ŋaê tau ŋanamba. 18 Amboac tonaŋ lau tokauc mêtêŋa taêŋ ênam biŋ tau acgom. Ŋac tokauc êkip bôcnê namba ŋam samaŋ, gebe namba tau ŋamalac teŋ nê. Ma namba tau 666.